| تبليغات | X |
بو گئجه من اؤلهجم
بو گئجه من اؤله جم، قالمیاجام صاباحا.
بئله هیجران گئجه سی گؤرمیه جم بیر داها.
سنی بو گوندن بری تاپشیریرام آللاها،
گون گله جک غرورون گؤزلریندن آخاجاق،
منه بو ائتدیکلرین سنه چوخا باخاجاق.
صاباحا دک جوجرر مزاریمین باش داشی،
قال یاشا سن دونیادا ایبلیسلرله یاناشی.
نانجیبین اؤنونده تؤکدوغون او گؤز یاشی،
منی مزاریمدا دا یاندیراجاق-یاخاجاق،
منه بو ائتدیکلرین سنه چوخا باخاجاق.
بو گئجه من اؤلورم الیم قالیر یاخاندا،
دیکسینمه سین گؤزلرین گؤزلریمه باخاندا.
عاصی روحوم سکسه نیب بدنیمدن چیخاندا،
بیر طوفان قوپاجاقدیر، بیر ایلدیریم شاخاجاق،
منه بو ائتدیکلرین سنه چوخا باخاجاق.
نه مدتدیر اورگیم الینده زیندان چکیر،
زلی کیمی بو سئوگی داماریمدان قان چکیر،
دئمیرسن کی بو یازیق نئچه ایلدیر جان چکیر،
سانیرسانمی دؤشونه بیری مئدال تاخاجاق!؟
منه بو ائتدیکلرین سنه چوخا باخاجاق.
ایلک شئعریم
لاختا-لاختا قان آخیر بولاغیندان-سویوندان،
یارالیدیر بو تورپاق قایغیسین چکن ایستر.
آماندیر قوچ ایگیدلر قورویالیم وطنی،
گون گلر اؤولادیمیز بیزلردن وطن ایستر.
خوجالینی گؤروب دینمز
کور اولوب گؤزو دونیانین
سؤز منه قالسا دئیردیم
ظالیمدیر اؤزودونیانین
قورتارمادیق اداسیندان
آه- ناله صداسیندان
ائرمنی قان- قاداسیندان
قارادیر اوزو دونیانین
قاتیللر سرافراز گزر
گونده مین بیر اویون بزر
ییخیلانی ووروب- ازر
آیاغی هوزو دونیانینبیر آز سرتلهشمیشم ایندی ایچیمدن،
داها آغلامیرام، داها گولمورم،
سانکی دویغولاریم چیخیب بیچیمدن،
منه نه اولوبدور؟- بونو بیلمیرم.
کؤنلومون آلووو اوغلان چاغیندا،
هارداسا چووغونا دوشوب، سؤنوبدور،
حسرتین، کدرین قاف داغلاریندا،
طیلسیمی بیلمهییب داشا دؤنوبدور.
بو دونیا یئتردی قاناد آچماغا،
او نه چوخ گئنیشدی، نه ده کی داردی،
ایچیمده آغلایان کؤورک اوشاغا،
بیر یالان وعدهیه آخی نه واردی؟!
بیر آز سرتلهشمیشم ایندی سوسورام،
یالانا، سیتمه قیزماغیم یوخدور،
وظیفه گزیرم، مقام پوسورام،
قولاغیم دولودور، گؤزلریم توخدور.
سن منه تبریزدین
بو گون دوز اون ایلدیر کوسموسن مندن،
قلبیمی یاندیریب یاخیرسان ایندی،
بویلانیب کؤنلومون دار دخمهسینین،
سسسیز باجاسیندان باخیرسان ایندی.
سنه گولدن آرتیق نه دئدیم من کی؟!
نه تئز مندن کوسدون، نه تئز اینجیدین؟!
هله ده آغلادیر، اؤلدورور منی،
گئدرکن گولهرک ساغ اول کی دئدین.
بو گون او آنلاردان اون ایل کئچسه ده،
"هله ده کؤنلومده بیر ایتیک دورور."
سنی ایتیردیگیم آنین آجیسی،
هله ده بئینیمه، قلبیمه وورور.
هله ده روحومون گیزلی بوجاغی،
رؤیامدا، یوخومدا یاشادیر سنی،
اورهییمسه بعضن دولوخساناندا،
شئعر ایله، ماهنییلا یارادیر سنی.
طالعین الینده اولدوق اویونجاق،
دویونجا گولمهدیک، دانیشمادیق بیز،
من سنه نه ایدیم- بیلمیرم، آنجاق،
سن منه تبریزدین، سن منه تبریز.
بیز باشقا دونیانین آداملاریییق،
بوراخ چیخیم گئدیم آمان گونودور.
اوغورسوز بیر عئشقین قوربانلاریییق،
بوراخ چیخیم گئدیم آمان گونودور.
منه چوخ اؤرگنمه بیل چتین اولار.
یوللارا گؤز تیکمک عادتین اولار.
عؤمورلوک گؤز یاشی قیسمتین اولار.
بوراخ چیخیم گئدیم آمان گونودور.
محبت اولانماز آخی بو قدر،
سن منی کرم تک یاندیرما هدر.
اسیری هردن ده آزاد ائدهرلر،
بوراخ چیخیم گئدیم آمان گونودور.
بیز سهو ائلهمیشیک نهده بیلمیرم؟
سن آزاد ائتسن ده گئده بیلمیرم.
من کی سنی خوشبخت ائده بیلمیرم،
بوراخ چیخیم گئدیم آمان گونودور.
